Duket sikur jetojmë në një botë tjetër. Disa vjet më parë, një Atalanta-Napoli do të ishte një sfidë simpatike e Serisë A, por jo më shumë, ndërsa një Juventus-Milan, duel për titull.
Sot ndodh e kundërta. Përballja për skudeton u luajt në Bergamo, dhe Napoli I trajnerit Antonio Konte tregoi se është pretendent I madh për t’ia dalë. Fitoi 3-2 ndaj Atalantës vendase, asaj që deri pak javë më parë ishte skuadra më në formë e Italisë, ndërsa ndeshja ishte një spektakël.
Mateo Politano dhe Skot Mektominei përmbysën avantazhin e hershëm të vendasve, arritur nga Retegi në 16’.
Pjesa e parë u mbyll 2-1 për të kaltrit, ndërsa shpejt pas pushimit, Lokman barazoi në 55’. Gjithsesi, fjalën e fundit e pati Napoli, dhe pikërisht ai që quhet “asi nën mëngë” I Kontes, Romelu Lukaku.
Të dy bashkë fituan titullin tek Interi, dhe duan ta bëjnë në stadiumin “Maradona”. Berat Gjimshiti, kapiteni kuqezi, ishte titullar dhe 90 minuta në fushë për Atalantën.
“Napoli I madh, – titullon “Il Korriere delo Sport”, – kryevepër e Kontes, fiton 3-2 në Bergamo! Të parët me 6 pikë plus ndaj Interit!
“La Gazeta delo Sport” thekson se Konte po arratiset pas spektaklit në Bergamo, dhe se tani I takon Interit! Për Juven, bën lojë fjalësh: Djall, çfarë Juve!
Në stadiumin “Alianc” të Torinos, fitorja e vendasve ishte e merituar. Pas një pjese të parë mjaft të bukur dhe thuajse të barabartë, “Zonja e Vjetër” bëri diferencën në të dytën.
Të rinjtë Mbangula dhe Ueah shënuan përkatësisht në 59’ e 64’, dhe bardhezinjtë mbajtën topin 60 për qind e bënë dyfishin e gjuajtjeve në kuadrat.
Napoli kryeson Serinë A me 50 pikë ndaj 44 të Interit që ka dy ndeshje më pak.
Juventusi ka 37 pikë dhe synon Championsin, ndërsa Milani e ka më keq, me vetëm 31.
