Kryetari i Komunës së Butelit dhe njëherësh kandidati i VMRO-DPMNE-së për mandatin e dytë, Darko Kostovski, ka publikuar një video nga takimi i tij me legjendën e sportit të Maqedonisë dhe qytetarin e nderit të Butelit, Shaban Tërstena.
Në një atmosferë miqësore, gjatë një çaji simbolik, Kostovski ka ndarë mirënjohjen dhe respektin e tij për kampionin olimpik, duke theksuar se Tërstena është krenari jo vetëm e Butelit, por e gjithë Maqedonisë.
“Është nder i jashtëzakonshëm të kesh bashkëqytetar të tillë, një kampion që me djersën dhe talentin e tij ka ngritur flamurin tonë në skenat më të mëdha botërore. Shaban Tërstena është simbol i përkushtimit, disiplinës dhe suksesit,” ka thënë Kostovski.
Kostovski me këtë rast ka kujtuar se Komuna e Butelit këtë vit e ka shpallur Tërstenën Qytetar Nderi, duke e vlerësuar si “sportist të shekullit” dhe frymëzim për gjeneratat e reja.
“Falënderime të përzemërta për mikpritjen dhe për shembullin që na jep çdo ditë. Kampionë të tillë janë pasuri kombëtare,” ka shtuar Kostovski.
Sipas Kostovskit Buteli është komunë e njerëzve të suksesshëm, të cilët me punë dhe vlera e bëjnë të njohur emrin e vendit në mbarë botën. Ky gjest i tij shihet si një tjetër dëshmi e përkushtimit për promovimin e figurave të shquara të komunitetit dhe forcimin e krenarisë lokale.
