Kryetari i Kuvendit të Republikës së Maqedonisë së Veriut, Afrim Gashi, morri pjesë në Tubimin internacional shkencor, në organizim të Universitetit MIT, me ligjërata nga profesorë të Universitetit të Oksfordit, në kuadër të Programit “Lidhja Oksford”.
Në fjalimin e tij, Kryetari Gashi theksoi se kjo ngjarje është një moment i veçantë për bashkësinë akademike, pasi ofron mundësi për forcimin e bashkëpunimit ndërkombëtar dhe shkëmbimin e njohurive dhe përvojave që kontribuojnë në avancimin e shkencës dhe teknologjisë.
Kryetari Gashi shprehu mbështetje për thellimin e bashkëpunimit midis institucioneve shkencore, nëpërmjet ngjarjeve të tilla, të cilat jo vetëm që mbështesin zhvillimin e shkencës dhe arsimit, por gjithashtu forcojnë përkushtimin tonë në fushat e kërkimit dhe njohurive, të cilat janë thelbësore për përparimin dhe përmirësimin e shoqërisë.
“Në një botë ku shkenca, inovacionet dhe teknologjia po përparojnë me shpejtësi të jashtëzakonshme, ndërsa shtetet konkurrojnë me zbulime të ndryshme, vendet e vogla si i yni përballen me sfidën për të ndjekur këtë ritëm të zhvillimit. Fatkeqësisht, shtetet si Maqedonia e Veriut dhe ato të rajonit nuk kanë avantazhe konkurruese në ekonomi dhe burime natyrore, siç kanë shtetet më të mëdha dhe më të fuqishme. Për këtë arsye, unë besoj fuqishëm se shkenca, kërkimi dhe njohuria janë fushat në të cilat duhet të konkurrojmë,” tha Gashi.
