Kryetari i Qeverisë së Republikës së Maqedonisë së Veriut, Dimitar Kovaçevski, së bashku me ministrin e Transportit dhe Lidhjeve, Blagoj Boçvarski, informuan për përzgjedhjen e transportuesve ajrorë që aplikuan në thirrjen publike për mbështetje financiare për linjat e reja ajrore për periudhën 2023 deri në vitin 2025. Kryeministri Kovaçevski theksoi se qëllimi strategjik i Qeverisë është shfrytëzimi i të gjitha objekteve të ofruara nga Aeroporti Ndërkombëtar i Shkupit dhe Aeroporti i Ohrit Shën Apostul Pali.
“Angazhimi ynë si Qeveri është që të ofrojmë shërbime cilësore me një gamë më të gjerë destinacionesh për qytetarët. Të dhënat tregojnë se në vitin 2022 do të kemi transportuar mbi 2.3 milionë pasagjerë përmes dy aeroporteve tona ndërkombëtare.
Transportuesit ajror Lufthansa dhe Wizz Air do të fluturojnë gjithashtu disa herë në ditë. Me linjën ajrore Lufthansa nëpërmjet Frankfurtit, qytetarët tanë do të kenë mundësinë të lidhen me më shumë se 200 destinacione në disa vende të Evropës dhe botës.
Jam i sigurt se duke subvencionuar linjat ajrore mundësojmë rritjen e ekonomisë edhe të trafikut ajror”, tha kryeministri.
Ministri Boçvarski theksoi se thirrja publike për subvencionimin e linjave të reja ajrore, e cila u shpall në përputhje me politikat e kushteve të drejta dhe konkurruese në përputhje me rregulloren e Bashkimit Evropian, zgjati nga 1 mars deri më 31 mars të këtij viti. Kërkesat për futjen e linjave të reja ajrore dhe mbështetje financiare për to janë paraqitur nga dy linja ajrore të njohura, Lufthansa dhe Wizz Air.
“Linja ajrore Lufthansa ka paraqitur kërkesë për vendosjen e një linje të re nga Aeroporti Ndërkombëtar i Shkupit në Aeroportin Ndërkombëtar të Frankfurtit, 10 herë në javë.
Kjo linjë fillon të funksionojë nga 23 prilli i këtij viti. Besojmë se kjo ka një rëndësi të madhe për të gjithë qytetarët sepse Aeroporti i Frankfurtit është një lloj HAB, i cili lidh të gjitha pjesët e botës me një numër të madh destinacionesh ndërkombëtare dhe ndërkontinentale. Kompania Wizz Air dorëzoi destinacionet e mëposhtme për të cilat u miratua mbështetja financiare:
Shkup – Luksemburg,
Shkup – Shtutgart,
Shkup – Salzburg dhe
Shkup – Lubjanë, për të cilën ka pasur interesim të madh nga qytetarët dhe komuniteti i biznesit. Në këto 4 destinacione planifikohet të ketë 3 fluturime në javë.
Këto linja është planifikuar të nisin nga 1 nëntori i këtij viti. Sa i përket subvencioneve, siç e përmenda, mbështetja financiare do të paguhet për vitet 2023, 2024 dhe 2025. Ministria e Transportit dhe Lidhjeve në buxhetin e saj të këtij viti tashmë ka paraparë 1.1 milionë euro për këtë qëllim dhe gjithsej 5 milionë euro për programin trevjeçar.
Sa i përket mbështetjes financiare do të jetë 7 euro në kundërvlerë në denarë për pasagjer në nisje të transportuar nga Aeroporti Ndërkombëtar i Shkupit”, tha Boçvarski dhe shtoi se transportuesit ajror për destinacionin për të cilin do të marrin mbështetje financiare do ta kenë obligim edhe pas përfundimit të subvencioneve të vazhdojnë të operojnë linjën për periudhën për të cilën kanë marrë subvencionet.
Në të kundërtën, ata do të jenë të detyruar të kthejnë të gjithë shumën e mjeteve që kanë marrë si mbështetje financiare.
Nga Aeroporti Ndërkombëtar i Shkupit janë hapur 5 destinacione të reja, kështu që nga 41 destinacionet e mëparshme tani janë 46 destinacione që do të operojnë nga aeroporti i Shkupit.
Politikat e Qeverisë synojnë zhvillimin e trafikut ajror në vend, sigurimin e zhvillimit cilësor të aviacionit civil, si dhe vendosjen e çmimeve konkurruese dhe destinacioneve të reja për qytetarët tanë, si dhe tërheqjen e turistëve nga e gjithë Evropa dhe më gjerë.
