Forca e Sigurisë së Kosovës ka bërë një hap të rëndësishëm drejt thellimit të bashkëpunimit në fushën e sigurisë dhe teknologjisë me Shtetet e Bashkuara të Amerikës.
Gjatë një ceremonie zyrtare të mbajtur sot në Prishtinë, Komandanti i FSK-së, Gjenerallejtënant Bashkim Jashari, dhe Drejtori i J6 në Komandën Evropiane të SHBA-së (EUCOM), Gjeneral Major John Phillips, nënshkruan Memorandumin e Marrëveshjes për Ndërveprueshmëri dhe Siguri në Komunikim (CISMOA).
Ky memorandum përfaqëson një marrëveshje kyçe të mbrojtjes ndërmjet Departamentit Amerikan të Mbrojtjes dhe FSK-së, duke mundësuar shkëmbimin e sigurt të informacionit, kriptimin e komunikimeve dhe përdorimin e teknologjisë së avancuar ushtarake.
Me këtë akt, Kosova bëhet partneri i 33-të global që nënshkruan CISMOA, siç është bërë e ditur nga Ambasada e SHBA-së në Prishtinë, e cila theksoi se kjo marrëveshje “rrit komunikimet e sigurta dhe ndërveprueshmërinë” ndërmjet forcave të dy vendeve. Në një postim zyrtar, Ambasada theksoi:
“Një hap i madh përpara për t’i bërë të dy kombet tona më të forta dhe më të sigurta. Urime FSK-së!”
Në takim, Gjenerallejtënant Jashari falënderoi Gjeneral Major Phillips për bashkëpunimin korrekt dhe profesional mes FSK-së dhe EUCOM-it, duke theksuar rëndësinë e partneritetit strategjik me SHBA-në, sidomos në fushën e sigurisë kibernetike dhe të komunikimeve.
Marrëveshja CISMOA pritet të fuqizojë më tej kapacitetet mbrojtëse të Kosovës dhe ta afrojë vendin drejt standardeve të avancuara të bashkëpunimit ndërkombëtar në mbrojtje.
