Korridori 8 sjell një impuls të ri zhvillimor për vendin, sjell përfitime për qytetarët dhe ekonominë, vlerësojnë dy partnerët më të mëdha të koalicionit qeveritar, LSDM dhe BDI.
“Ndërtimi i Korridorit 8 nënkupton kosto më të ulëta transporti, transport më të shpejtë, lidhje dhe integrim të Maqedonisë së Veriut, si dhe zhvillim ekonomik dhe rajonal të vendit. Ndërtimi i autostradave moderne, në pjesët Tetovë – Gostivar, Gostivar – Bukojçan, Trebenisht – Strugë – Qaf Than, ofron lidhje më të mira dhe më të sigurta për qytetarët, kushte më të mira për ekonominë, një nxitje domethënëse për rritjen e tregtisë dhe investimeve. Korridori 8 është pjesë e projektit më të madh infrastrukturor në vendin tonë deri më tani në sektorin e rrugëve, për ndërtimin e katër seksioneve të autostradës me një gjatësi totale prej rreth 110 kilometrash, me vlerë 1.3 miliardë euro”, thonë nga LSDM.
Në anën tjetër nga BDI thonë se dita e djeshme shënon nismën e realizimit të projektit më të madh infrastrukturor në historinë e vendit tonë që do të kontribuojë në hapjen e vendeve të punës, zhvillimin e kompanive vendore, zhvillimin ekonomik dhe përmirësimin e cilësisë së jetës.
“BDI konsideron se projektet si Korridori 8 dhe 10-D, autostrada Shkup – Bllacë, autostrada Kërçovë – Bukojçan dhe rruga nga Ura e Boshkut deri në fshatin Izvor, që në tërësi arrijnë vlerë të mbi 2 miliardë euro, paraqesin nxitësin më të madh dhe më ambicioz në historinë e vendit tonë. Pas realizimit dhe zbatimit të pjesës normative të Marrëveshjes së Ohrit, anëtarësimit në NATO, nisjes së negociatave për anëtarësimin në Bashkimin Europian, BDI është e fokusuar në zhvillimin ekonomik dhe infrastrukturor të vendit, bashkë edhe me vazhdimin e rrugëtimit tonë europian”, thuhet në komunikatën me shkrim të BDI-së.
Këto projekte, shkruan më tej në komunikatën, do të mundësojnë hapjen e vendeve të reja të punës, angazhimin e të gjitha kompanive vendore dhe zhvillimin e tyre, si dhe do të kenë ndikime pozitive anësore në ekonominë e vendit me ç’rast cilësia e jetesës do të përafrohet me standardet europiane.
Ndryshe, Qeveria e Republikës së Maqedonisë së Veriut kohë më parë ka përmbyllur me sukses të gjitha procedurat ligjore, përzgjodhi në mënyrë transparente dhe konform të gjitha dispozitave ligjore konsulentin dhe mbikëqyrësin e realizimit të projektit, finalizoi me epilog të suksesshëm negociatat me konzorciumin ndërkombëtar Bechtel Enka, pas së cilave u vendosën nënshkrimet në marrëveshjen historike që paraqet investimin më të madh kapital në infrastrukturën rrugore të vendit, në vlerë prej 1.3 miliardë euro.
Ndërtimi i Korridorit 8 pritet të përfundojë në afat prej rreth 5 viteve. Ky korridor do të reflektojë padyshim në funksionimin më efikas të transportit të mallrave, do të ketë impakt të jashtëzakonshëm në zhvillimin ekonomik të vendit dhe në veçanti për vendet e mbarë rajonin, do të jetë urë e përjetshme lidhëse që do të përforcojë bashkëpunimin.
