“KONCERTI” PARTIAK!

 
Sa herë që në Romën e lashtë mbretëronte varfëria, kriza morale, kriza politike, paria udhëheqëse sajonte diçka për ta zhvendosur vëmendjen e popullit nga krizat e ndryshme. Një nga format e zhvendosjes së vëmendjes nga problemet akute, ishte organizimi i luftërave të gladiatorëve, me ç’rast jo që përgjakeshin arenat, por ndodhte që të pranishmit, popullata e thjeshtë, të përjetonte delirium të vërtetë, pavarësisht faktit se shumica e tyre vdisnin nga uria. “Festat” e këtilla që përdoreshin kryekëput për ta mashtruar, manipuluar dhe nënshtruar popullatën, janë të njohura dhe natyrisht vazhdojnë të përdoren edhe sot e kësaj dite.
Shënime i 22 vjetorit të Marrëveshjes së Ohrit është një akt, të cilin duhet ta festojnë të gjithë shqiptarët e Maqedonisë së Veriut, sepse kjo Marrëveshje historike u arrit me konsensus të përfaqësuesve të të gjitha subjekteve shqiptare, përfshi edhe përfaqësuesit e Ushtrisë Çlirimtare Kombëtare.
Por, fatkeqësisht, kjo Marrëveshje sikur është bërë pronë private e disa individëve, të cilët, në emër të shënimit të këtij përvjetori organizojnë disa aktivitete (si në Romën e lashtë) që me asgjë nuk e reflektojnë rëndësinë e Marrëveshjes së Ohrit. Ç’lidhje ka kjo datë historike me disa këngëtarë të estradës muzikore, të cilit të dielën në mbrëmje erdhën në Shkup dhe mbajtën një koncert organizuar nga BDI-ja. Për këta këngëtarë u ndanë disa dhjetëra e dhjetëra mijëra euro, para këto gjithsesi edhe të taksapaguesve shqiptarë, të cilët nuk ia kanë dhënë askujt të drejtën që t’i keqpërdorin këto mjete.
Gjithë ata të rinj që u tubuan për ta përcjellë këtë koncert, realisht nuk kanë asgjë me BDI-në dhe prezenca e tyre nuk mund të konsiderohet si barometër për të treguar fuqinë e partisë aktuale në pushtet. Është qesharake krenaria e tyre me këtë prezencë. Do të ishte krejt diçka tjetër dhe në funksion të barometrit të saktë dhe legjitim, nëse në një koncert të tillë do të këndonin Artan Grubi dhe funksionarët tjerë. Vetëm atëherë do të mund të vlerësohej prezenca e simpatizantëve të kësaj partie, e cila prezencë, për shkak të rrethanave aktuale, gjithsesi do të ishte simbolike.
Shënimi i përvjetorit të Marrëveshjes së Ohrit, duhet të jetë vetëm një raport me fakte të qëndrueshme rreth arritjeve në planin ekonomik, social, arsimor e kulturor.
Është pikërisht realiteti që po i lakuriqëson deri në palcë manipuluesit e zëshëm të partisë shqiptare në pushtet, të cilët mundohen që këtë realitet të na e bëjnë “parajsë” me një koncert shumë të shtrenjtë.
Në këtë kohë krizë, që përcillet me shumë probleme ekzistenciale, të organizosh një koncert tepër të shtrenjtë me vulë partie, vërtet është më shumë se hipokrizi. Sepse koncertet partiake, janë vetëm koncerte mashtrimi.
Manipulimet e tilla, fatmirësisht janë bërë të tejdukshme dhe të lexueshme…Lajme24