Komuna e Tetovës, përmes një demanti publik, ka reaguar ndaj deklaratave të kandidatit nga radhët e AKI-së, Bajram Rexhepi, i cili në një konferencë për shtyp ka pretenduar se rruga “Boris Kidriç” nuk posedon leje ndërtimi. Nga Komuna theksojnë se ky është një lajm i pavërtetë dhe se për rrugën në fjalë ekziston leje ndërtimi, e miratuar sipas të gjitha procedurave ligjore, duke përfshirë edhe vendimin e Këshillit Komunal.
Në reagim, Komuna e Tetovës e cilëson daljen publike të Rexhepit si një përpjekje të dështuar për të tërhequr vëmendjen, në mungesë të një programi konkret dhe vizioni politik. Komuna apelon tek qytetarët që të mos bien pre e propagandës politike, ndërsa i kërkon kandidatit të tërhiqet nga shpifjet dhe të kërkojë falje publike, përndryshe ndaj tij do të iniciohet procedurë ligjore për shpifje.
Në dokumentet e publikuara nga Komuna gjendet leja e ndërtimit dhe vendimi i këshillit, që vërtetojnë ligjshmërinë e këtij projekti.
