Viktor Pavllovski, Sasho Stefanovski e Petar Gjurovski me propozim të VMRO-DPMNE-së, shkruan Alsat.
Cvetanka Minovska me propozim të Lëvizjes Znam, Gordana Manojllova me propozim të LSDM-së.
Afrona Verzivolli dhe Nafije Selmani me propozim të koalicioni VLEN, janë shtatë kandidatët e propozuar për anëtarë të këshillit të Agjencisë së Mediave, të cilët morën mbështetjen në komisionin parlamentar për zgjedhje dhe emërime.
Para se të propozojnë kandidatët, nga LSDM patën nevojë për konsultime shtesë.
“Me qëllim për tu koordinuar si grup i deputetëve, kërkoj pauzë prej 15 minutave”, tha Sanja Llukarevska – LSDM.
Duke parë situatën me koordinime, nga Fronti Evropian akuzuan se çështja është politizuar dhe se kandidatët që propozohen, janë caktuar paraprakisht. Për këtë arsye vendosën ta braktisin seancën.
“Duket që janë të koordinuar mirë në këtë rast VMRO-ja, me ZNAM-in, ndoshta edhe me LSDM-në. Nga ana tjetër edhe me Levicën, e krejt këta pastaj të koordinuar edhe me VLEN-in. Kështu që për të mos u bërë pjesë e gjithë kësaj dhe për të shprehur edhe njëherë kundërshtimin tonë për ndërhyrje të politikës në mediume, na mbetet që ta lëshojmë këtë seancë në shenjë proteste. Prandaj ftoj kolegët e Frontit Evropian që ta braktisim këtë seancë. Faleminderit”, tha Ilire Dauti – FE.
Për konsultime shtesë, pati nevojë edhe koalicioni VLEN.
“Unë kërkoj falje nga kolegët por më duhet një konsultim plotësues dhe kërkoj një pauzë plus 15 minuta”, tha Rijad Shaqiri – VLEN.
Dy kandidatët më të kontestuar që nga seanca e parë kur u dëgjuan biografitë e tyre, ishin pikërisht dy kandidatet e propozuara nga koalicioni VLEN, Afrona Verzivolli dhe Nafije Selmani. E para ishte emëruar si kryerevizore e fondeve IPA por më pas u shkarkua nga Qeveria për shkak se nuk posedonte certifikatë. Pas kësaj, koalicioni VLEN pati premtuar se ajo shumë shpejtë do të rikthehet në pozitën nga e cila u shkarkua. Ndërsa kandidatja Nafije Selmani hiç më larg se në zgjedhjet e 24 majit, ishte kandidate për deputete në zonën e parë zgjedhore, e radhitur e gjashta në listën e koalicionit VLEN.
Selmani gjithashtu ka qenë kandidate e Lëvizjes Besa për kryetare të Qytetit të Shkupit, por edhe këshilltare në komunën e Çairit, nga radhët e Alternativës. Deputeti i LSDM-së Lupço Nikollovski, fillimisht për anëtar e propozoi kandidatin Arben Saiti, por nuk mori mbështetje nga deputetët. Pas kësaj, deputetja Sanja Llukarevska, propozoi kandidaten Gordana Manojllova. Në garë gjithsej ishin 22 kandidatë ndërsa këshilli i Agjencisë së Mediave duhet të përbëhet nga shtatë anëtarë./ Alsat.mk
