Prokurori publik i shtetit nuk duhet të ketë të drejtë të rizgjedhjes dhe duhet të zgjidhet dhe shkarkohet me shumicë të kualifikuar në Parlament. Këto janë dy rekomandimet kryesore që vendi mori nga Komisioni i Venedikut në lidhje me mendimin e kërkuar mbi ligjet për Prokurori publike dhe Këshillin e prokurorëve publikë. Megjithatë, për të zbatuar rekomandimet, do të jenë të nevojshme ndryshime kushtetuese e jo ligjore.
“Me qëllim përmirësimin e pavarësisë së Prokurorisë publike, Komisioni i Venedikut rekomandon, para së gjithash, në kontekstin e një reforme kushtetuese të ardhshme, që Kushtetuta të ndryshohet në pikat e mëposhtme, në mënyrë që të mos parashikojë mundësinë e riemërimit të prokurorit publik dhe të sigurojë shumicë të kualifikuar në Parlament për emërimin dhe shkarkimin e tij”, thonë nga Komisioni i Venecias.
Aktualisht, mandati i prokurorit publik në vend është gjashtë vjet, me të drejtë për rizgjedhje. Për Këshillin e prokurorëve publik, Komisioni i Venecias rekomandon sqarime të mëtejshme se kush mund të jetë anëtar i Këshillit, dhe gjithashtu kërkon që funksioni i prokurorit të pezullohet gjatë mandatit në Këshill.
“Funksioni i prokurorëve të zgjedhur si anëtarë të Këshillit të prokurorëve publik të pezullohet për kohëzgjatjen e mandatit të tyre në Këshill. Funksioni i anëtarit të Këshillit nuk përkon me anëtarësimin në parti politike ose me kryerjen e ndonjë detyre apo profesioni publik”, njoftojnë nga Komisioni i Venecias.
Komisioni rekomandon që aftësitë menaxheriale dhe organizative të përfshihen në kriteret për pozicionin e prokurorit publik, që çdo dënim penal me dënim me burgim të ndërpresë mandatin e prokurorëve dhe që Qeveria të detyrohet të paraqesë shpjegim të qartë në Parlament kur shmanget nga mendimi i Këshillit të prokurorëve publik për shkarkimin e prokurorit publik. Sipas agjendës së reformës, Ligji për Prokurori Publike dhe Ligji për Këshillin e Prokurorëve Publikë duhet të miratohen në Parlament deri në dhjetor të këtij viti. /Alsat.mk
