Pritjet e gjata në vendkalimin kufitar të Bllacës, kanë shkaktuar revolt te qytetarët. Ata që pyetëm na thanë se kanë pritur deri në dy orë në kolonë nga Maqedonia për të hyrë në Kosovë.
Ekipi i TV21 filmoi nga afër kolonat deri në 2 kilometra të gjata, ku qytetarët shprehën nervozizëm.
Në ditën e dytë të Fitër Bajramit, kur shumë qytetarë në dyja anët e kufirit kanë familje dhe vijnë e shkojnë për festë, durimit i vjen fundi për disa prej udhëtarëve, të cilët zihen për radhë të makinave.
“Në ditën më të ngarkuar pothuajse të vitit, janë vetëm tre korsi të cilat punojnë këtu në kufirin e Bllacës. Ndërkaq, nervozizmi është shumë i madh i qytetarëve, të cilët thonë se kanë pritur dy orë. Kolonave nuk iu shihet fundi, andej në cep. Ndërsa disa prej qytetarëve kanë gjetur një alternativë duke ardhur nga fshati Bllacë dhe duke hyrë në mënyrë anësore sikurse po shihen në video.”, raporton Adnan Qaili, gazetar.
Disa vendosën të kthehen nga kanë ardhur, e disa të tjerë ia mësynë në këmbë për të kaluar kufirin.
“Pritjet janë shumë të mërzitshme dhe ne vlerësojmë se është pa nevojë të bëhet gjithë kjo pritje. Nuk e kuptojmë çfarë është qëllimi. Ky është një malltretim i popullsisë edhe këndej edhe andej. Kërkojmë që sa më shpejtë të jetë e mundur ky malltretim të evitohet prej këtu. Kaq di të them!”
“Qe një orë jemi duke pritur. Ku janë qeveria e re tash që na premtuan se do ta bëjnë One Stop Shop. Fjalë boshe, gënjeshtarë! Mos luani me popullin, vetëm tek shqiptarët ndodh kjo rrëmujë. Turp të kenë!
“Shumë, gati një orë kemi pritur këtu dhe nuk ka asgjë prej tyre. A e sheh se edhe iu bie sirenave dhe atyre nuk iu intereson asgjë.”
“Kemi nja gjysmë ore që po presim, nuk është në rregull, por shpresojmë që prej nesër një pikë kufitare të funksionoj dhe të ulet pritja. Shumica e banorëve të Shkupit ne kemi lidhje familjare, unë jam nga Kaçaniku dhe tërë familjen e kam andej dhe duhet të presim me orë të tëra për të shkuar te familjarët”
Pesë javë më parë në vendkalimin kufitar të Bllacës zhvilluan takim dypalësh ministrat e brendshëm Pançe Toshkovski dhe Xhelal Sveçla. Të pranishëm ishin edhe Zv.kryeministri i parë i Maqedonisë së Veriut, Izet Mexhiti dhe ambasadori i Kosovës në Maqedoninë e Veriut, Florian Qehaja. Ata thanë se sistemi i integruar i dy pikave kufitare Bllacë-Hani Elezit do të vihet në një sistem të përbashkët nga 1 Prilli, ku kontrollet do të bëhen vetëm në hyrje të shteteve përkatëse. Sipas tyre “One Stop Shop” pritet të zvogëloj kohën e pritjes, të lehtësoj lëvizjen e qytetarëve, mallrave dhe shërbimeve.
