Për herë të parë ndër vite, Gjermania nuk është më destinacioni kryesor i azilkërkuesve në Europë.
“Welt am Sonntag” citoi raportin e prillit 2025 të Komisionit të BE-së, të konsideruar si konfidencial, mbi situatën e emigrimit në BE dhe vendet e treta. Aty rezulton që tashmë vendin e parë për aplikimet e mban aktualisht Franca me gati 41.000 kërkesa të regjistruara nga 1 janari deri më 31 mars të këtij viti. Pastaj renditet Spanja (39.318 kërkesa për azil) dhe e treta Gjermania.
Në Gjermani, numri i kërkesave për azil ka rënë me 41 për qind në tremujorin e parë të këtij viti krahasuar me të njëjtën periudhë të vitit të kaluar ku kishte 37.387 aplikime. Në fund të renditjees së BE gjenden Hungaria me 22 kërkesa për azil dhe Sllovakia me 37 kërkesa. Sipas raportit të Welt am Sonntag, një e katërta e të gjitha aplikimeve për mbrojtje në Gjermani bëhen nga sirianë (24 përqind), të ndjekur nga afganët (16 përqind) dhe turqit (11 përqind).
Franca është bërë vendi numër një i destinacionit për ukrainasit. Shumica e atyre që kërkojnë mbrojtje në BE, si dhe Zvicër dhe Norvegji erdhën nga Venezuela, të ndjekur nga azilkërkuesit nga Afganistani dhe Siria. Kërkesat për azil jo vetëm nga ukrainasit, por edhe kinezët dhe indianët gjithashtu u rritën ndjeshëm. Në të kundërt, dukshëm më pak njerëz nga Siria, Kolumbia dhe Turqia kanë aplikuar për azil gjatë kësaj periudhe.
