Kryetari i Komunës së Tetovës, Bilall Kasami, ka vizituar dy nxënësit që u sulmuan mbrëmë në qytet, ku bashkë me familjarët e tyre ndau shqetësimin dhe dhimbjen për këtë ngjarje të rëndë.
“Dhuna nuk do të bëhet normë në Tetovë dhe nuk do të tolerohet. Është obligim i yni ta parandalojmë atë që në rrënjë. Familjarëve u kam garantuar se do të bëj gjithçka që organet përkatëse të veprojnë pa vonesë dhe dhunuesit të përballen me drejtësinë menjëherë”, theksoi Kasami.
Ai vlerësoi reagimin e shpejtë dhe të saktë të Sektorit për Punë të Brendshme në Tetovë, duke theksuar se një qasje e tillë është garanci që raste të ngjashme të mos përsëriten.
Kasami u zotua se institucionet lokale do të jenë në krah të qytetarëve dhe do të punojnë për një Tetovë të sigurt për të gjithë.
