Kryetari i Komunës së Tetovës, Bilall Kasami, takoi sot në shtëpinë e tyre veteranin e arsimit, Azir Aziri dhe artisten e njohur tetovare, Anita Aziri. Takimi u shoqërua me një bisedë të ngrohtë, ku përveç mikpritjes, u ndanë edhe histori frymëzuese mbi sfidat në arsim dhe art ndër vite.
Kasami theksoi se Tetova ka pasur fatin të rritet me mësues që hapin horizonte dhe me artistë që ushqejnë shpirtin, duke lënë gjurmë të pashlyeshme në identitetin e qytetit.
“Arsimi dhe arti janë themeli i çdo shoqërie të mirëfilltë”, deklaroi ai, duke vënë në dukje rëndësinë që këto dy fusha mbajnë për të ardhmen e Tetovës.
