Kryetari i Tetovës Bilall Kasami, sonte në TV21 ka folur për vizionin e tij për Tetovën në mandatin e tij të dytë. Kasami tha se gjatë mandatit të parë është stabilizuar Tetova, si dhe njëkohësisht ka realizuar shumë projekte infrastrukturore.
Kasami tha se e ka përgjysmuar borxhin e Komunës së Tetovës, ndërsa tha se do të ketë edhe shumë projekte të mëdha në mandatin e dytë, duke përmendur ndërtimin e Teleferikut për në Kodrën e Diellit.
“Për katër vite stabilizuam Tetovë, përgjysmuam borxhin dhe realizuam shumë projekte infrastrukturore. Në Kapitullin e Dytë të zhvillimit përpilojmë Planin Gjeneral Urbanistik, veçmë është kontraktuar instituti INSI nga Kosova, ndërsa për periudhë rekord për një vit do të kemi Planin Gjeneral Urbanistik, i cili mungon që 20 vite. Do të ndërtojmë 3 pishina, 6 salla sportive, 2 shkolla të mesme, 3 shkolla fillore, kolektori për ujërat e zeza do të vazhdojë të ndërtohet, do të ndërtojmë teleferikun për në Kodrën e Diellit, dhe kemi shumë të tjera, por këto janë më të rëndësishme”, tha mes tjerash Kasami.
Ai gjithashtu tha se planifikon të ndërtojë stacion modern për autobusët në hyrje të qytetit, si dhe zhvillim të transportit publik.
“Do të kemi një linjë të veçantë të transportit publik që do të mbulojë pjesën më të madhe të qytetit. Do të ketë vende parkimi për autobusët. Ndërsa i siguroj qytetarët se transporti publik do të jetë falas”, tha Kasami.
