Kryetari i Komunës së Tetovës, Bilall Kasami, sonte në hapjen e shtabit zgjedhor në Tetovë, rikujtoi rrugëtimin e tij katërvjeçar në drejtimin e komunës dhe paraqiti vizionin për mandatin e ardhshëm.
Kasami theksoi se gjendja e komunës në vitin 2021, kur ai dhe ekipi i tij morën drejtimin, ishte dramatike, me 24 milionë euro borxh, mungesë transparence dhe keqmenaxhim total. “Administrata, ndërmarrjet publike dhe i gjithë funksionimi i komunës ishin në gjendje të mjerueshme. Borxhi prej 24 milionë eurosh nuk ishte investuar, por i vjedhur”, tha ai.
Kryetari përmendi tre parimet kryesore që kanë udhëhequr punën e tij: mosankimi për trashëgiminë e keqe, hapja e komunës për qytetarët dhe ofrimi i zgjidhjeve thelbësore, jo sipërfaqësore.
Në fjalimin e tij, Kasami bëri krahasimin mes qeverisjes së kaluar dhe asaj aktuale “Ata e futën komunën në borxh dhe e lanë Tetovën pa ujë; ne e përgjysmuam borxhin dhe e bëmë qytetin me ujë të pijshëm. Ata e futën komunën në borxh dhe e lanë qytetin në mbeturina; ne e pastruam Tetovën. Ata me 24 milionë euro borxh nuk ndërtuan stadium; ne nisëm ndërtimin e stadiumit për Shkëndijën. Ata nuk hapën bulevarde, ne ndërtuam segmente të rëndësishme të tyre. Ata lanë lumin e ndotur, ne e pastruam Shkumbinin dhe e siguruam për fëmijët tanë. Ata nuk bënë shkolla, ne ndërtuam dhe rinovuam dhjetëra. Ata lanë qytetin në terr, ne vendosëm ndriçim LED në çdo lagje dhe fshat”, tha ai.
Kasami theksoi se ndryshimi që solli VLEN në Tetovë është i prekshëm në çdo fushë dhe qytetarët nuk duhet të lejojnë rikthimin e situatës së mëparshme. “Katër vite ishin të mjaftueshme për ta ndalur keqbërjen në Tetovë. Na duhen edhe katër vite për t’i dhënë hov zhvillimit të madh të komunës sonë”, tha ai.
Ai u bëri thirrje qytetarëve që më 19 tetor të votojnë për VLEN, duke e quajtur këtë një betejë të dytë për ta kompletuar kapitullin e ri të Tetovës. “Hapëm një rrugë të re për Tetovën. Fitorja e 19 tetorit është e pashmangshme, sepse është fitore e qytetarëve. Ju faleminderit e na priftë e mbara!”, përfundoi Kasami, mes duartrokitjeve të aktivistëve dhe përkrahësve.
