Ylli i mirënjohur i Hollywoodit, Jennifer Lopez, ka publikuar videoklipin “Can’t Get Enough”, këngë e cila është pjesë e albumit të saj të ri “This Is Me… Now: A Love Story”, i cili do të lansohet me datën 16 të muajit shkurt të këtij viti, raporton CNN.
Tema e videoklipit të saj të ri është dasma, diçka që e karakterizon jetën e Lopezit, pasi që ajo ka qenë e martuar katër herë. Në video shihet Lopez e veshur me tri vello të ndryshme teksa kërcen me tre dhëndurë të ndryshëm.
“Ky djalë s’ka shanse” thotë një nga mysafirët e dasmës në videoklip duke vënë bast për zgjatjen e martesës.
“Mos e prit buqetën e luleve. Është e mallkuar”, thotë një tjetër mysafire ndërsa Lopez gjuan buqetën.
E mallkuar apo jo, Lopez duket se po kalon shumë mirë në martesën e saj të fundit me aktorin e mirënjohur Ben Affleck, me të cilin u martua në vitin 2022, 20 vjet pas fejesës të cilën e kishin ndërprerë në vitin 2002.
Lopez më parë ishte e martuar me Ojani Noan, valltarin Chris Jud dhe me këngëtarin latin Marck Anthony me të cilin ka dy fëmijët binjak, Max dhe Emme.
“Jam njëfarë eksperte e dasmave në mënyrë të çuditshme, por jo edhe aq e martesave”, ka thënë Lopez me shaka për gazetarin e revistës “Variety”, Marc Malkin përgjatë tepihut të kuq të ceremonisë “Golden Globes”.
Tema që kishte zgjedhur për videoklipin duket të jetë fushë e njohur për këngëtaren pasi ajo ka luajtur në filma që kanë të bëjnë me martesën si “The Wedding Planner” film nga viti 2001, “Monster In Law” në 2005, si dhe “Merry Me” dhe “Shotgun Wedding” që janë filma të vitit të kaluar.
