Ka një muaj që ka lindur por kujtimet e asaj nate i ka ende të freskëta. 28 vjeçarja, D, I, në një rrëfim për Kiks Kosovën tregon se si u demoralizua nga trajtimi që iu bë nga stafi mjekësor gjatë procesit të lindjes së foshnjës.
Sipas saj, ndonëse ishte në fazën e dhimbjeve të lindjes, mamia dhe mjekja kujdestare zgjodhën të konfrontohen me fjalë.
Krejt kjo, ngase mamia kishte vendosur që pacientën ta dërgonte në sallë për lindje pa u konsultuar me mjekën.
Sipas 28 vjeçares, në sallën e lindjes ku qëndroi për gati 5 orë, thotë të jetë abuzuar emocionalisht nga mamia e mjekja kujdestare.
Sipas D. I, mjekës në sallë, thotë që i pengonin edhe britmat e saj, ndonëse janë shumë normale për një grua që përjeton lindjen.
Madje edhe një mami tjetër, sipas pacientës, kishte refuzuar t’i ofronte edhe ujë për të pirë. Trauma e radhës për nënën e re, ishte kur dëgjoi nga mamia që foshnja e saj kishte një anomali në dorë, gjë kjo e cila thotë që ka qenë jo e vërtetë ngase foshnja e saj tani është shëndosh e mirë.
E tronditur, ajo thotë se nuk kishte pasur mundësi as të shihte beben menjëherë pas lindjes, e që ndërkohë qepja e lindjes kishte filluar dhe që i shkaktoi dhimbje të forta, por që reagimi që mori nga personeli nuk qe ngushëllues.
Gruaja rrëfen se ka qëndruar për dy orë në sallë pa lëvizur dhe pa asnjë informacion për foshnjën e saj.
Ndërkohë që as familja e saj nuk ishte njoftuar për asgjë gjatë gjithë kohës, as për gjendjen e nënës e as të foshnjës.
E vetmja anë pozitive e kësaj eksperience, për 28 vjeçaren qe nata kur një familjare e saj qëndroi fshehtas në dhomë për t’u kujdesur për atë dhe bebën e saj.
Por që edhe stafi, në repartin e paslindjes thotë që qëlluan të ishin më njerëzor dhe nuk u sollën shumë keq me të.
