Disa ditë me radhë ish ministri i Shëndetësisë Bekim Sali dhe ai aktual,
Fatmir Mexhiti janë duke u përplasur lidhur me (mos) pagesën ndaj
kompanisë BRAKO e cila ka ndërtuar spitalin modular në Tetovë, e që në
dokumentarin e publikuar në IRL shihet se ato janë ndërtuar jashtë çdo
standardit.
Për këtë çështje ish ministri Bekim Sali, ka njoftuar se ka kërkuar
revizion të brendshëm ku janë detektuar mangësitë dhe ka urdhëruar që të
mos paguhet BRAKO.
Nga ana tjetër ministri Fatmir Mexhiti, deri dje ka mohuar se Ministria
e Shëndetësisë me kërkesë të Qeverisë ka paguar BRAKON për spitalet
modulare.
Megjithatë në paraqitjen e tij më 13 korrik të këtij viti, vet ministri
Mexhiti e konfirmon se BRAKO-s janë dhënë para për spitalet modulare,
përfshirë spitalin e Tetovës.
“Jemi ulur me pronarët e kompanisë, jemi marrë vesh që të hiqen kamatat,
dhe në dakordësi të paguhet ajo shumë, atë që ata e kanë ndërtuar, ajo
që është në rregull, ndërsa të largohet ajo që e kërkojnë. Këtë e kemi
kaluar në Qeveri, si informacion dhe për këtë kemi kërkuar përkrahje”,
kishte deklaruar ministri Fatmir Mexhiti.
https://www.koha.mk/wp-content/uploads/2023/08/VID-20230818-WA0005.mp4?_=1
