Ushtria izraelite ka shkatërruar një bllok ndërtesash të larta në Qytetin e Gazës, kulla e dytë e madhe që është shënjestruar brenda pak ditësh.
Ministri i Mbrojtjes, Israel Katz, postoi një video të shembjes së ndërtesës në platformën X, me mbishkrimin: “Po vazhdojmë”.
Forcat Mbrojtëse të Izraelit (IDF), të cilat kanë zgjeruar operacionet në Gaza, thanë se Kulla Sussi po përdorej nga Hamasi, një pretendim i mohuar nga grupi militant.
Sipas BBC, nuk dihet nëse nga sulmi ka viktima. Përpara sulmit të së shtunës, Izraeli hodhi fletëpalosje duke përsëritur thirrjet për palestinezët që të zhvendoseshin në atë që e quan zonë humanitare në jug.
IDF ka inkurajuar vazhdimisht civilët të zhvendosen atje, duke thënë se do të ofrohet kujdes mjekësor, ujë dhe ushqim.
Megjithatë, OKB-ja ka thënë se kampet me tenda në al-Mawasi janë të mbipopulluara dhe të pasigurta, dhe se spitalet jugore janë të mbingarkuara.
Të martën, pesë fëmijë u vranë ndërsa prisnin në radhë për ujë në al-Mawasi. Dëshmitarët thanë se u goditën nga një dron izraelit, një incident për të cilin IDF tha se ishte “nën shqyrtim”.
Kulla Sussi është ndërtesa e dytë shumëkatëshe që shkatërrohet brenda pak ditësh. Të premten, Izraeli shkatërroi kullën më të lartë në qytetin e Gazës.
