Ministra izraelitë po hartojnë plane për arrestimin e aktivistes suedeze për klimën Greta Thunberg, duke e mbajtur në kushte sigurie të krahasueshme me ato që përdoren për të dyshuar për terrorizëm. Kjo pas nisjes së saj nga Spanja të dielën, si pjesë e flotës më të madhe ndonjëherë me destinacion Gazën.
Thunberg është e shoqëruar nga figura të njohura ndërkombëtare, përfshirë aktoren amerikane Susan Sarandon, aktorin Liam Cunningham nga “Game of Thrones” dhe ish-kryebashkiaken e Barcelonës, Ada Colau. Ata e kanë quajtur nismën e tyre “misioni më i madh i solidaritetit” në histori.
Sipas organizatorëve, më 4 shtator pritet të nisen edhe dhjetëra anije të tjera nga Tunizia dhe porte të tjera të Mesdheut, për t’iu bashkuar flotës ndërkombëtare Sumud. Qëllimi është thyerja simbolike e bllokadës së Gazës, si një protestë ndaj luftës dhe gjendjes së rëndë humanitare në territorin palestinez.
Por ministri izraelit i Sigurisë Kombëtare, Itamar Ben Gvir, i njohur për qëndrimet e tij të ekstremit të djathtë, ka bërë të ditur përmes burimeve se do t’i paraqesë kryeministrit Benjamin Netanyahu një plan për ndalimin e pjesëmarrësve të flotës në qendra paraburgimi si Kziot dhe Damon, të cilat përdoren për të burgosur të dyshuar për terrorizëm. Lajmi u publikua fillimisht nga e përditshmja izraelite Israel Hayom.
