Një palestinez i burgosur nga Izraeli për një sulm kur ishte 13 vjeç është liruar pas gati një dekade në burg.
Ahmed Manasra, i cili tani është 23 vjeç, u bë simbol i një vale dhune izraelito-palestineze që filloi në 2015, raporton BBC.
Rasti i Manasra ka qenë prej kohësh në fokus të grupeve të të drejtave të njeriut. Amnesty International tha se ai duroi “keqtrajtime tronditëse”, duke përfshirë gati dy vjet izolim, duke bërë që te ai të zhvilloheshin sëmundje të rënda mendore, transmeton gazeta online Reporteri.net.
Avokati i tij, Khaled Zabarqa tha për BBC se ai u lirua pas vuajtjes së dënimit.
Pas goditjeve me thikë, Manasra u largua nga vendi i ngjarjes dhe u përplas nga një makinë. Një video grafike e shpërndarë gjerësisht në mediat sociale e tregoi atë teksa ishte shtrirë duke gjakosur shumë në rrugë dhe një kalimtar izraelit e tallte.
Këto pamje provokuan zemërim në botën arabe dhe shumë supozuan se djali kishte vdekur. Megjithatë, disa ditë më vonë autoritetet izraelite publikuan një foto të tij duke u trajtuar në spital.
Më vonë, Manasra u dënua për tentativë vrasjeje dhe u dënua me nëntë vjet e gjysmë burg.
