Zëvendëskryeministri i parë, Izet Mexhiti, ka shpërndarë një status të fuqishëm në rrjetin social Facebook, ku ka hedhur akuza të rënda ndaj Bashkimit Demokratik për Integrim (BDI), duke e konsideruar këtë parti përgjegjëse për heshtjen përballë një sërë ngjarjesh tragjike që kanë ndodhur gjatë qëndrimit të saj në pushtet.
Mexhiti rendit një sërë rastesh që, sipas tij, kanë tronditur opinionin publik, përfshirë rastet “Sopoti”, “Alfa”, “Monstra”, vrasjen e Harun Aliut, burgosjen e ish-komandantëve të UÇK-së, tragjedinë e autobusit të “Durmo Turs”, djegien e spitalit COVID në Tetovë dhe aksidentin tragjik të “Besa Trans”, duke theksuar se për asnjërën nga këto nuk është dhënë përgjegjësi institucionale apo politike.
“BDI qëndroi në pushtet gjatë të gjitha këtyre ngjarjeve. Asnjë dorëheqje, asnjë përgjegjësi, vetëm heshtje,” shprehet Mexhiti, duke theksuar se tani ka ardhur një kohë e re për shqiptarët.
Ai e mbyll reagimin e tij me një mesazh të qartë: “Koha e BDI-së ka kaluar. Sot shqiptarët janë në pushtet, ndërsa BDI-ja është dhe do të mbetet në opozitë. Rrini rahat.”
