Kandidati i koalicionit VLEN për komunën e Çairit, Izet Mexhiti, ka treguar edhe një herë se vizioni i tij për Çairin nuk mbetet vetëm në fjalë, por shndërrohet në vepra konkrete.
Ai ka bërë të ditur se brenda një kohe shumë të shkurtër, është realizuar një kërkesë e kahmotshme e banorëve të Teneqe Mahallës, ndërtimi i një parkingu të ri, i cili do të lehtësojë dukshëm jetën e përditshme të qytetarëve.
“Pardje na u prezentua kërkesa, sot po e realizojmë! Parking në Teneqe Mahallë! Vetëm për ty Çair!”, shkroi Mexhiti, duke dëshmuar se komunikimi i drejtpërdrejtë me qytetarët është themeli i fushatës së tij.
Kjo ndërhyrje vjen si përgjigje ndaj një prej problemeve më të mëdha që banorët e kësaj zone kanë hasur prej vitesh: mungesa e hapësirave për parkim dhe kaosi urban që kjo gjendje ka sjellë. Me ndërtimin e parkingut, jo vetëm që u ofrohet zgjidhje një problemi të përditshëm, por edhe rritet cilësia e jetës për qindra familje që jetojnë në atë pjesë të Çairit.
Ky veprim i shpejtë dhe i drejtpërdrejtë tregon qartë stilin e politikës që përfaqëson Mexhiti – një politikë të bazuar në veprime konkrete, në shërbim të qytetarëve, larg premtimeve boshe që për vite me radhë kanë mbetur vetëm në letër.
“Çairi nuk ka më kohë për të pritur. Banorët meritojnë zgjidhje të shpejta, efikase dhe të dukshme. Ky parking është vetëm fillimi i një rruge të re, ku çdo problem i qytetarëve do të marrë përgjigjen e merituar,” theksoi ai.
Banorët e Teneqe Mahallës e kanë pritur me entuziazëm këtë hap, duke e parë si një sinjal se zëri i tyre po dëgjohet dhe se problemet e përditshme mund të zgjidhen kur ka vullnet të vërtetë.
Izet Mexhiti, gjatë fushatës së tij, ka deklaruar vazhdimisht se synimi i tij kryesor është që Çairi të kthehet në një komunë moderne, funksionale dhe me kushte më të mira për të gjithë qytetarët. Realizimi i këtij parkingu është një dëshmi konkrete e asaj qasjeje.
“Vetëm për ty Çair!” nuk është vetëm një slogan, por një premtim që tashmë po merr formë në realitetin e përditshëm të banorëve.
