Zv/Kryeministri dhe kryetari i Lëvizjes Demokratike, Izet Mexhiti, ka uruar besimtarët me rastin e Fitër Bajramit përmes një mesazhi në rrjetet sociale, duke e cilësuar këtë festë si një bekim dhe shpërblim hyjnor pas një muaji agjërimi dhe reflektimi.
Në statusin e tij, Mexhiti theksoi rëndësinë e durimit, vetëpërmbajtjes dhe përkushtimit si vlera të kultivuara gjatë muajit të shenjtë të Ramazanit, të cilat janë gjithashtu thelbësore për ndërtimin e një të ardhmeje më të drejtë dhe më të bashkuar për shoqërinë.
“Ashtu si agjërimi na mësoi durimin, vetëpërmbajtjen dhe përkushtimin, edhe përpjekja jonë e përbashkët për të mirën e përgjithshme kërkon përkushtim, durim dhe sakrificë,” u shpreh ai.
Duke cituar një fragment nga Kur’ani, “Paqja është ajo që është urdhëruar për ty. Dhe o besimtarë, bëni paqe mes jush”, Mexhiti theksoi rëndësinë e unitetit dhe solidaritetit, duke inkurajuar që kjo frymë të shndërrohet në vepra konkrete për të mirën e përbashkët.
Në fund të mesazhit të tij, ai uroi që paqja, mëshira dhe begatia e Zotit të jenë mbi të gjithë, duke theksuar se “ashtu si sakrifica e agjërimit na përgatit për një shpërblim të madh, edhe puna jonë e përbashkët do të sjellë frytet e veta për shoqërinë dhe vendin tonë.”
Gëzuar Fitër Bajramin!
