Pak para mesnatës, Ministri i Mjedisit Jetësor dhe Planifikimit Hapësinor, Izet Mexhiti, vizitoi fshatin Straçincë ku u takua me banorët që po protestonin kundër hapjes së gurrores në këtë zonë.
Mexhiti informoi banorët se ka marrë vendim negativ për kërkesën e hapjes së gurrores, pas shqyrtimit të raporteve dhe analizave të institucioneve kompetente. Sipas tij, rezultatet kanë treguar se ky aktivitet do të shkaktonte pasoja të rënda, përfshirë rrezikun nga vërshimet si dhe dëmtimin e shëndetit dhe jetesës së banorëve.
“Vendimi im është i prerë: gurorja nuk do të hapet”, theksoi Mexhiti.
Ai njoftoi gjithashtu se hapi i radhës është anulimi përfundimtar i koncesionit, i cili pritet të shqyrtohet në mbledhjen e ardhshme të Qeverisë. Ky hap, sipas tij, do ta mbyllë përfundimisht këtë çështje dhe do të vendosë drejtësinë në anën e banorëve.
