Një mbrëmje e mbushur me ngrohtësi dhe mikpritje u zhvillua në Serovë, në ambientet tradicionale të Konakut të familjes Haxhi Ali Iseni, ku kandidati i Vlen për kryetar të komunës së Çairit, Izet Mexhiti, realizoi një vizitë miqësore.
Vizita u karakterizua nga biseda të hapura, të sinqerta dhe një atmosferë që pasqyroi vlerat më të larta të mikpritjes shqiptare.
“Isha i nderuar të vizitoja familjen Haxhi Ali Iseni, një familje me vizion, përkushtim dhe dashuri për të mirën publike. Takimi me ta ishte jo vetëm i këndshëm, por edhe frymëzues”, shkruan Mexhiti.
Gjatë takimit, u diskutua për sfidat dhe mundësitë që ka Çairi, si dhe për projektet që tashmë po japin rezultate konkrete në përmirësimin e jetës së përditshme të qytetarëve.
“Qytetarët e përkushtuar, si kjo familje, janë pasuri e vërtetë për komunën tonë. Ata jo vetëm që ruajnë vlerat tradicionale, por janë gjithashtu të angazhuar në ndërtimin e një të ardhmeje më të mirë për të gjithë”, shtoi Mexhiti.
Ai falënderoi nga zemra për mikpritjen dhe vlerësoi lart kontributin e familjes Iseni në forcimin e lidhjes midis qytetarëve dhe përfaqësuesve të tyre.
“Çdo bashkëbisedim i tillë është një mundësi për të ndarë ide, për të dëgjuar nga afër nevojat reale dhe për të ndërtuar ura të forta bashkëpunimi”, përfundon kështu në postimin e tij, Mexhiti.
