Inspektorati i tregut ka gjobitur 4 kompani, 3 nga Shkupi dhe 1 nga Kumanova për shitjen e bukës me çmim më të lartë se 33 denarë.
“Në këto kontrolle janë bërë 4 procesverbale me parregullsi të konstatuara, janë shqiptuar gjoba prej mbi 300.000 denarë. Siç e kam përmendur edhe më parë gjobat janë shumë të larta, sipas ligjit për tregti dhe ligjit për mbrojtjen e konsumatorëve, ku variojnë nga 500 deri në 10.000 euro për person juridik ose nga 50 deri në 500 euro për person përgjegjës në personin juridik”, bën të ditur Aleksandra Koteli, nga Inspektorati i tregut.
Ky Inspektorat në dy ditët e kaluara kreu kontrolle në më shumë se 400 subjekte ekonomike në nivel të të gjithë vendit dhe konstatoi se në përgjithësi është respektuar vendimi për ngrirjen e çmimit të bukës 450 gramëshe në 33 denarë.
