Një tjetër goditje e rëndë për BDI-në opozitare vjen nga Petroveci. Naser Haliti, ish ushtar i Ushtrisë Çlirimtare Kombëtare dhe deri më tani kryetar i degës së BDI-së në këtë komunë, ka shpallur dorëheqjen e tij të parevokueshme pas më shumë se dy dekadash angazhim brenda partisë së Ali Ahmetit.
Në statusin e tij publik në facebook, Haliti thekson se arsyeja e largimit është mungesa e reformimit, riciklimi i të njëjtëve figura dhe përgatitja e fëmijëve të tyre për të trashëguar pushtetin brenda partisë, duke e kthyer BDI-në në një strukturë nepotiste që ka humbur çdo lidhje me idealet e para.
Haliti ka deklaruar se prej tash angazhimin e tij politik do ta vazhdojë në Lëvizjen Demokratike, pjesë e koalicionit qeverisës VLEN, ku sheh parime, vizion dhe hapësirë për të ndërtuar një të ardhme ndryshe.
