Një përulje që ka tronditur opinionin, deputeti Rijad Shaqiri, i zgjedhur nga votat kundër BDI-së, është parë duke i zgjatur dorën kreut të kësaj partie, Ali Ahmetit. Ky gjest ka shkaktuar zemërim të thellë te qytetarët, aktivistët dhe ish-luftëtarët e UÇK-së, përfshirë edhe Musk Bilalin, i cili reagoi ashpër ndaj këtij akti të cilësuar si “tradhëti morale”.
Muski Bilali, një emër i njohur i luftës dhe bir i një nëne të arrestuar padrejtësisht për rastin “Monstra”, nuk kurseu fjalët në adresë të Shaqirit, duke e akuzuar për nënshtrim dhe përçmim të vullnetit qytetar.
“Rijad Shaqiri, marre është për ty me shku me ju përul Ali Ahmetit, kur e di se ai ka dëmtu njerëz gjatë qeverisjes 22-vjeçare dhe ka prek ku nuk duhet, pikërisht në fshatin tënd. Ti ki ardh me votat e krejtve kundër BDI-së!”, ka shkruar Bilali në një status të fortë që po shpërndahet gjerësisht në rrjetet sociale.
Ky akt i Shaqirit shihet si kthesë e papritur dhe e pajustifikueshme, veçanërisht kur ai vetë vetëm pak ditë më parë nga foltorja e Kuvendit lëshoi akuza të rënda ndaj Ali Ahmetit. Sot, ai përkulet para tij.
Për shumëkënd, kjo nuk është vetëm një lëvizje politike, por një akt që zhvesh nga dinjiteti kauzën për të cilën qytetarët votuan: fundin e një regjimi të gjatë e të akuzuar për korrupsion, nepotizëm dhe padrejtësi.
