Në prag të fushatës për zgjedhjet lokale të 19 tetorit, Instituti për hulumtime politike – Shkup (IPIS) ka publikuar sondazhin e realizuar për nevojat e Radiotelevizionit të Maqedonisë (RTM), i cili sjell një tablo të re për garën në kryeqytet dhe komunat përreth.
Bashkim Bakiu, kandidati i VLEN-it, së bashku me bartësin e listës Zekerija Berisha, është sot kandidati shqiptar me mbështetjen më të madhe në Shkup. Me 6.2% të përkrahjes, ai po fiton terren dhe po konsolidohet si figura më e besueshme për elektoratin shqiptar.
Në anën tjetër, Skender Rexhepi Zejd i AKI-së, së bashku me bartësin e listës Abdulselam Selamin, me 5.8%, po shfaqen në rënie. Strategjia e tyre për ta shndërruar këtë garë lokale në një “referendum” etnik nuk ka dhënë efekt. Shqiptarët po e refuzojnë këtë narrativë të konsumuar, duke treguar se nuk i besojnë më retorikave që ngritin artificialisht çështje etnike në zgjedhje lokale.
Mexhiti e Murtezi bindshëm në Çair… Elmazi e Idrizi drejt fitores në Saraj!
Kjo prirje e sondazhit nuk ndalet vetëm te Qyteti i Shkupit. Në Çair, zëvendëskryeministri i parë Izet Mexhiti, së bashku me bartësin e listës Muhamed Murtezi, sipas të gjitha matjeve të opinionit publik prijnë dukshëm përballë Bujar Osmanit dhe Kemal Matoshit.
Ndërsa në Saraj, Muhamed Elmazi dhe bartësi i listës Amir Idrizi, si dy figura të reja politike, po fitojnë terren përballë kandidaturave të Blerant Ramadanit dhe Iljaz Veselit, të cilat më shumë kanë shkaktuar hutim tek banorët për shkak të kundërshtive të tyre politike si dy parti të ndryshme.
Ky sondazh i IPIS-it jep mesazhin e qartë se VLEN, përmes kandidatëve të saj, po fiton besimin e shqiptarëve dhe po konsolidohet si forca politike në Shkup, ndërsa AKI-ja me narrativën e saj për “referendum” po humb terren dhe besueshmëri.
Edhe kryetari i Partisë Demokratike Shqiptare, Menduh Thaçi, në një intervistë të fundit deklaroi se VLEN do t’i fitojë zgjedhjet edhe pa mbështetjen e VMRO-DPMNE-së.
Në panoramën e përgjithshme të garës, Orce Gjorgjievski prin me 29%, ndërsa 29.6% e votuesve mbeten ende të pavendosur. Kaja Shukova ka 8.1% dhe Goran Markovski 5.9%, duke plotësuar renditjen.
