Zëvendësministri i Bujqësisë, Albrim Hoxha, ka ndarë një histori inspiruese nga jeta reale, që tregon se përkushtimi dhe durimi shpërblehen në sistemin tonë.
“Kam dëgjuar shumë histori jetësore këto ditë, por ajo e zonjës Ajshe më mbeti në mendje”, tha Hoxha. “Ajo është 60 vjeçe, inxhiniere e Agronomisë nga Kosova, e martuar në Tetovë prej 33 vitesh. Megjithëse ka vetëm 3 vite përvojë pune të rregullt, ajo ka kaluar një jetë me përpjekje dhe pengesa, duke konkurruar shumë herë dhe duke u refuzuar po aq shpesh”.
“Dje, zonja Ajshe nisi me punë në Ministrinë e Bujqësisë”. shtoi ai. “Kjo tregon që përpjekjet nuk janë kot dhe se në institucionet tona ia vlen të luftosh për mundësi dhe drejtësi. Sepse ia VLEN!” përfundoi zëvendësministri, duke theksuar se puna dhe durimi sjellin rezultate të prekshme për qytetarët dhe institucionet.
