Në vend që vëmendja të përqendrohej në analizën e ndeshjes mes Serbisë dhe Anglisë në stadiumin “Marakana”, ajo u zbeh nga një incident i rëndë në tribuna.
Mbështetës të presidentit serb Aleksandar Vuçiq sulmuan tifozë që brohorisnin parulla si “Kush nuk kërcen, është çaci” dhe “Pumpaj”.
Sipas raportimeve të portalit Nova.rs, një nga personat më të përfolur gjatë këtij incidenti ishte Milosh Lukovac, një emër tashmë i njohur për publikun rajonal për lidhjet e tij me dhunën dhe aktivitetet në shërbim të regjimit të Vuçiqit.
Lukovac njihet si një nga figurat që shpesh ndodhet në vijën e parë kur duhet “mbrojtur me forcë” figura e presidentit serb. Portali kroat “Gol” ka kujtuar edhe paraqitjen e tij në ngjarjen e arteve marciale “Golden Fight”, mbajtur më 6 prill 2024 në Zagreb, ku u mposht pas vetëm 32 sekondash nga luftëtari kroat Roko Djordjiq.
Vëmendje të madhe atëherë kishte marrë fakti që Lukovac hyri në oktagon nën tingujt e himnit malazez “Oj svijetla majska zoro”. Pamjet nga ajo mbrëmje qarkullojnë ende në rrjete sociale dhe përdoren si ilustrim i një debutimi të dështuar të Lukovacit në sportet luftarake.
Përveç Beogradit dhe Zagrebit, emri i tij është përmendur edhe në Riga të Letonisë, ku sipas mediave ai kishte rol për të “qetësuar” zërat kundër regjimit të Partisë Progresive Serbe (SNS).
Ndërsa në stadiumin “Marakana”, ai u shfaq sërish në rolin e dhunuesit – këtë herë ndaj tifozëve në mesin e të cilëve kishte edhe fëmijë. Pamjet e sulmit kanë shkaktuar reagime të ashpra dhe kanë rihapur debatin mbi rolin e njerëzve si Lukovac në rrjetën politike dhe tifozësh që mbështet pushtetin aktual në Serbi. /Vijesti
