Njëri nga liderët e koalicionit VLEN, Zeqirija Ibraimi, ka reaguar në prag të ndeshjes së rëndësishme të Shkëndijës, duke përcjellë një mesazh të fuqishëm për tifozët dhe opinionin publik.
“Shkëndija është krenaria jonë sportive, simbol i energjisë, pasionit dhe shpirtit shqiptar në sport. Ajo nuk ka nevojë për thirrje urrejtjeje që na turpërojnë si shoqëri, por për brohorima zemre që na nderojnë si popull!”, shkruan Ibraimi.
Ai thekson se stadiumet janë vendi ku rriten ëndrrat dhe festohet loja e bukur, jo urrejtja dhe përçarja, duke kujtuar se shqiptarët gjithmonë kanë dëshmuar se dinë të jenë tifozë të zjarrtë e njëkohësisht të civilizuar.
“Ne, shqiptarët, si gjithmonë, e kemi dëshmuar se dimë të jemi tifozë të zjarrtë dhe të civilizuar njëkohësisht. Andaj sot e për çdo ndeshje, të jemi ZË i Shkëndijës, por një zë që buron nga dashuria, jo nga mllefi. Sepse ajo që na përfaqëson në Europë nuk është vetëm futbolli i mirë, por edhe sjellja jonë”, thekson Ibraimi.
Në fund, ai përçoi një mesazh emocional që rezonon thellë me tifozët dhe të gjithë qytetarët: “Me zemër për Shkëndijën. Me dinjitet për veten tonë. Me vlera për brezat që na ndjekin. Shkëndija jemi të gjithë ne. Dhe, ne jemi më të mëdhenj kur jemi të drejtë”.
