Kompania hungareze e telefonisë celulare “4iG” është e vetmja kompani e cila ka paraqitur ofertë në tenderin e Agjencisë për komunikime elektronike për dhënien e lejeve për operator të ri të rrjetit.
Komisioni për zbatimin e tenderit me ankand publik sot në hapjen e ofertave në AKE konstatoi se kjo kompani që këtu është regjistruar si “One Macedonia Telecommunications” si ofertuese i ka dorëzuar të gjitha dokumentet, përcjell INA.
Kryetari i këtij komisioni, Igor Bojaxhiev theksoi se do të vijoj procedura konform ligjit.
“Procedura do të vazhdojë konform ligjit. Do të vijojë vlerësim i dokumentacionit, pas së cilës do të përgatitet raport”, theksoi Bojaxhiev.
Vendimi pritet të merret pas përfundimit të procesit zgjedhor.
Dokumentacion rreth tenderit për operator të tretë celular dorëzuan tre kompani.
Operatori i ri potencial celular në vend, sipas kushteve të tenderit, duhet të fillojë punën në fund të vitit 2026.
Kompania hungareze 4iG në tetor 2024 regjistroi në Shkup kompaninë përfaqësuese “One Macedonia Telecommunications” me adresën e zyrës avokatore “Mihajloski & Popovska”, ku bashkëthemelues është avokati Aleksandar Mihajloski.
“Pas disa blerjeve të suksesshme në Shqipëri dhe Mal të Zi, 4iG Group filloi përgatitjet për të hyrë në tregun e Maqedonisë së Veriut, me themelimin e filialit “One Macedonia Telecommunications”. Me vendimin e Bordit të Grupit, kompania e re do të themelohet nga Antenna Hungária Zrt., pjesë e 4iG Group, në kuadër të së cilës është portofoli i telekomunikacionit të grupit të info-komunikimit në Hungari dhe në Ballkanin Perëndimor. Regjistrimi i kompanisë ka përfunduar dhe me themelimin e kësaj kompanie, 4iG Group synon që sa më shpejt të hyjë në tregun e telekomunikacionit në Maqedoninë e Veriut”, thuhej në njoftimin e kësaj kompanie.
