Ndërmarrjet publike të Qytetit të Shkupit, “Higjiena Komunale” dhe “Parqet dhe Gjelbërimi”, do të drejtohen nga kuadro të Koalicionit VLEN, mëson Plusinfo.
Kjo marrëveshje e rëndësishme koalicioni për rishpërndarjen e funksioneve në nivel lokal mes VMRO-DPMNE-së dhe VLEN-it është arritur së fundmi.
Burime të larta partiake kanë konfirmuar se Gjorgjievski kërkon të hyjë në veprim konkret menjëherë pas zgjedhjeve lokale dhe i ka kërkuar udhëheqësisë së VMRO-DPMNE-së që pozicionet e rëndësishme brenda koalicionit të mos lihen për t’u vendosur më vonë, veçanërisht pasi ai ka paralajmëruar një “gjenerallkë” për pastrimin e Shkupit që nga dita e parë.
Për këtë arsye, grupe pune të VMRO-DPMNE-së dhe të VLEN-it po zhvillojnë bisedime aktive për ndarjen e kuadrove në ndërmarrjet publike që janë nën kompetencë të Qytetit të Shkupit. Sipas të njëjtave burime, tashmë ka pajtim që disa ndërmarrje, mes tyre “Parket dhe Gjelbërimi” dhe “Higjiena Komunale”, do të drejtohen nga kuadro të përcaktuar nga VLEN-i. Kjo qasje shihet si dëshmi se partnerët qeveritarë e kanë të qartë pritjen e qytetarëve për rezultate të shpejta, si në nivel qendror, ashtu edhe lokal.
Sipas sondazheve për zgjedhjet e ardhshme lokale, kandidati i VMRO-DPMNE-së për kryetar të Shkupit, Orce Gjorgjievski, është në epërsi bindëse ndaj kandidatëve të tjerë dhe pritet fitore e sigurt e tij. Ndërsa kandidati për kryetar të Çairit nga VLEN-i, zëvendëskryeministri i parë aktual Izer Mehmeti, po ashtu prin në sondazhe.
Duke pasur parasysh mbështetjen e lartë të VMRO-DPMNE-së dhe VLEN-it në anketa, pas zgjedhjeve të 19 tetorit të dy partitë do të kenë mundësi të caktojnë kuadro në ndërmarrje dhe me këtë të përmirësojnë gjendjen në kryeqytet. Në “Higjiena Komunale” aktualisht punojnë rreth 1.200 të punësuar, ndërsa në “Parqet dhe Gjelbërimi” rreth 500.
Në promovimin e sotëm të kandidaturës së Gjorgjievskit për kryetar të Shkupit nga VMRO-DPMNE, ai dhe kryeministri Hristijan Mickoski theksuan se Shkupi është një qytet i ndotur dhe i lënë pas dore, që duhet urgjentisht të pastrohet dhe të marrë pamje të një metropoli. Ata nënvizuan se ndërmarrjet publike të qytetit do të kenë rol kyç në këtë proces. Gjorgjievski theksoi se puna e parë me të cilën do të merret është higjiena publike.
