Deputeti dhe lideri i partisë E Majta, Dimitar Apasiev, ka reaguar pas një përplasjeje fizike që ndodhi në ambientet e Kuvendit të Maqedonisë së Veriut me deputetin e VMRO-DPMNE-së, Petar Ristovski – Pekata. Ai deklaroi për “Fokus” se tensionet lindën si pasojë e publikimit nga E Majta të shpenzimeve të udhëtimit të deputetit Ristovski, të cilat arrijnë rreth 14.300 euro – shifër që e ka bërë atë të njohur si “rekordmen”.
“Nuk është e pranueshme që sa herë që më sheh, të më ofendojë familjen, vetëm sepse kemi publikuar të dhëna zyrtare për shpenzimet e tij. Ky është një sulm personal që nuk do ta toleroj më”, u shpreh Apasiev.
Sipas tij, incidenti ndodhi kur Ristovski e ndaloi në korridor dhe e paralajmëroi që të ndalojë publikimin e shpenzimeve të tij. “I thashë që të ndalojë së ofenduari gruan dhe fëmijët e mi. Ai reagoi duke më kërcënuar fizikisht dhe më kapi për fyti. Unë reagova për t’u mbrojtur dhe e godita me një filxhan në qafë,” tha Apasiev.
Ai shtoi se për muaj të tërë, grupi parlamentar i E Majta është vënë nën presion të vazhdueshëm nga Ristovski, ndërsa institucionet, sipas tij, nuk kanë marrë asnjë masë për t’i mbrojtur.
“Ky është një sjellje gangstere që ka kaluar çdo kufi. Nëse institucionet nuk reagojnë, do të mbrohemi vetë. Nuk do të lejoj më që dikush të shajë familjen time pa pasoja,” përfundoi Apasiev.
Incidenti është ndërprerë nga disa deputetë të tjerë, ndërsa rojet e Kuvendit nuk kanë ndërhyrë menjëherë.
