Aktor i njohur dhe aktualisht drejtor i Teatrit të Tetovës, Hasim Memishi Sopi, ka bërë një reagim të ashpër e ironik në rrjetet sociale, duke adresuar kritikë të drejtpërdrejta ndaj një ish-funksionari që për dy dekada ka mbajtur poste publike, por sipas tij nuk ka realizuar asnjë punë konkrete.
Në postimin e tij, Sopi shprehet:
“20 vjet ka qenë funksionar, 1 punë nuk e ka bë, tash i duket se gjithçka shkon keq… Epooo, nuk i ke më xhamat e zi, ke fillu t’i shohish gjërat ashtu si janë.”
Me tone ironike dhe përdorimin e emotikoneve për ta shoqëruar mesazhin, drejtori i Teatrit të Tetovës duket se synon të vërë në pah fenomenin e politikanëve afatgjatë që, pasi largohen nga pushteti, fillojnë të shfaqen si kritikë të ashpër të sistemit, ndërkohë që gjatë periudhës së tyre në detyrë nuk kanë ofruar rezultate të prekshme.
Reagimi i Hasim Memishi Sopi-t është komentuar gjerësisht nga ndjekësit, të cilët e kanë përshëndetur për guximin dhe qartësinë e mesazhit, ndërsa disa të tjerë e kanë parë si një reflektim të realitetit të njohur në politikën vendore.
Kjo nuk është hera e parë që Sopi, i cili njihet si një figurë aktive jo vetëm në skenën artistike, por edhe në debatin publik, përdor rrjetet sociale për të komentuar zhvillimet politike dhe shoqërore në vend.
