Kreu i Shoqatës “Jetimat e Ballkanit”, Halil Kastrati ka njoftuar mega projektin e radhës.
Humanisti përmes rrjeteve sociale ka njoftuar ndërtimin e Qendrës Rezidenciale për Autizëm dhe Sindromën Down për fëmijë dhe të rritur.
“Një Ramazan për Historinë – Të Nisim Bashkë Mega Projektin e Humanizmit. Të dashur vëllezër dhe motra,Ky Ramazan është një mundësi që të bëjmë një ndryshim të madh, një vepër që do të lërë gjurmë përjetësisht. Me zemrat plot besim dhe duart plot dashuri, ne po nisim mega projektin e Shoqatës “Jetimat e Ballkanit” – Qendrën Rezidenciale për Autizëm dhe Sindromën Down! Imagjinoni një vend ku fëmijët dhe të rriturit me autizëm dhe sindromën Down nuk janë vetëm, ku kanë përkujdesje të plotë, edukim, terapi dhe dashuri pa kufi. Një qendër që do të bëhet shtëpi për ta, dritë për prindërit e tyre dhe një model për gjithë botën. Ky është një projekt që kërkon zemra të mëdha dhe duar bujare! Ky është një mision që nuk mund ta bëjmë vetëm – por së bashku, si gjithmonë, mund ta bëjmë realitet! Të mos e lëmë këtë Ramazan të kalojë pa bërë diçka të madhe për këta fëmijë! Kush dhuron për këtë qendër, dhuron një jetë më të mirë për ata që kanë më shumë nevojë. Dhurimi juaj është dera e shpresës, është buzëqeshja e një fëmije, është garancia që askush nuk mbetet vetëm! Na ndihmoni ta ndërtojmë këtë ëndërr! Dhuroni tani dhe bëhuni pjesë e një historie që do të shkruhet me dashuri dhe humanizëm!”, ka shkruar Kastrati.
