Teksa edicioni i katërt i “Big Brother VIP” po i afrohet finales së madhe më 19 prill, banorët kanë filluar të reflektojnë mbi rrugëtimin e tyre brenda shtëpisë më të famshme në Shqipëri.
Një ndër ta, Gjesti, ndau me publikun disa nga mësimet më të rëndësishme që ka marrë gjatë këtij formati.
“Kam mësuar që në sfidën që e kam pasur me qëndruar 16 orë, nuk e kam menduar se do ta bëja. E kam pasur gjithmonë durimin si armën time më të fortë, por nuk e dija se e kisha kaq shumë”, tha banori.
Gjesti shtoi se gjatë këtij udhëtimi ka përmirësuar edhe mënyrën e tij të të sjellurit me të tjerët:
“Kam mësuar si të dua, si të sillem me njerëzit. Kam mësuar të jem i fortë. Do të dal nga kjo shtëpi një Besart më i përmirësuar”.
Ndër momentet më domethënëse për të, ai theksoi ndjenjën e përkatësisë dhe dashurinë për vendin:
“Kam mësuar të dua vendin tim, kjo është më e rëndësishmja. Kam mësuar që unë nuk dorëzohem, çkado që të më dalë përballë. Nëse zgjidhem, nuk do të dorëzohem deri në kiamet”.
Finalja e BBVA 4 pritet të sjellë emocione të forta, ndërsa publiku pret të zbulojë se kush do të kurorëzohet fituesi i këtij edicioni.
