Kryeparlamentari Afrim Gashi, ka pritur sot në një takim të veçantë bashkatdhetarët nga mërgata shqiptare, me të cilët zhvilloi një bisedë të hapur dhe miqësore mbi sfidat, kontributin dhe rolin e tyre të pazëvendësueshëm në raport me atdheun.
“Nuk ishte një takim formal, por një moment i ngrohtë, i sinqertë dhe thellësisht domethënës”, ka shkruar Gashi në Facebook, duke nënvizuar ndjesinë e afërsisë dhe përkushtimit reciprok.
Ai u shpreh thellësisht mirënjohës për kontributin e përditshëm të mërgatës, jo vetëm ekonomik, por edhe kulturor e kombëtar – për ruajtjen e gjuhës, për përkushtimin ndaj traditës dhe për mbajtjen gjallë të shpresës për një të ardhme më të mirë për vendin. “Biseduam për sfidat që kanë, për lidhjen e pazëvendësueshme me atdheun dhe për mënyrat konkrete si mund ta forcojmë bashkëpunimin tonë”, tha më tej kryeparlamentari, duke shtuar se dera e Kuvendit do të mbetet gjithmonë e hapur për mërgatën dhe energjinë e saj pozitive.
