Kryeministrja e Danimarkës Mette Frederiksen gjatë një bisede telefonike sot me presidentin e zgjedhur të SHBA-së Donald Trump, ka shprehur qëndrimin e saj se Grenlanda ka të drejtë të vendosë vetë për të ardhmen e saj.
Gjatë bisedës e cila zgjati 45 minuta, Frederiksen tha se Danimarka ishte gati të rriste përgjegjësinë e saj për sigurinë në Arktik. Ajo përsëriti gjithashtu deklaratat e kryeministrit të Grenlandës Mute Egede, i cili së fundmi e bëri të qartë se Grenlanda nuk është në shitje.
Trump nuk u përgjigj publikisht, por ai ri-postoi sondazhin e vitit 2019 në platformën e tij Truth Social, sipas së cilit 68% e grenlandezëve mbështesin pavarësinë nga Danimarka. Pritet të zhvillohet një referendum për pavarësinë dhe Danimarka tashmë ka thënë se do të respektojë çdo rezultat.
Trump shkaktoi një stuhi në Kopenhagë javën e kaluar kur la të kuptohet se SHBA-të donin të blinin një ishull Arktik të vendosur në territorin danez. Javën e kaluar, Trump kërcënoi Danimarkën me tarifa të larta nëse nuk hiqte dorë nga Grenlanda.
SHBA është tregu i dytë më i madh i eksportit të Danimarkës, kështu që tarifat e synuara do të kishin një ndikim të rëndësishëm në ekonominë e tyre.
Sot, Frederiksen do të mbajë një takim krize me liderët e biznesit. Gjithashtu është planifikuar një mbledhje urgjente e Këshillit të Politikës së Jashtme, ku do të marrin pjesë përfaqësues nga i gjithë parlamenti.
TV2 raporton se fakti që biseda telefonike ka zgjatur 45 minuta është një shenjë se çështja e Grenlandës është diçka që Trump po e konsideron seriozisht.
