Piloti i Red Bull-it, Max Verstappen, triumfoi në Çmimin e Madh të Japonisë, garën e tretë të kampionatit të sivjetëm në Formula 1.
Holandezi festoi për të katërtin vit radhazi në “Suzuka”, dhe me këtë e regjistroi edhe fitoren e parë këtë sezon, përpara Lando Norris me McLaren. Në podium iu bashkua edhe shoku i skuadrës së Norris-it, Oscar Piastri.
Pas tyre, vijuan Charles Leclerc, i cili e shënoi garën e tij të 150-të në karrierë, pastaj George Russell, Andrea Antonelli, Lewis Hamilton, ndërsa Top 10 u plotësua nga Isack Hadjar, Alex Albon dhe i shkëlqyeri Ollie Bearman.
Gara në “Suzuka” u karakterizua me një incident në dalje nga pit-stop-i, kur Verstappen dhe Norris në të njëjtën kohë vendosën të ndërrojnë gomat. Katër herë kampioni botëror mbajti vijën e tij, ndërsa britaniku tentoi ta parakalojë nga jashtë, duke u dukur se Verstappen e shtyu pak dhe ai përfundoi në bar, por drejtori i garës vendosi se nuk kishte nevojë për hetime shtesë.
