Homazhe në qendrën përkujtimore “Nëna Shqiptare” në Zajaz të Kërçovës, 20-vjetori i Akademisë solemne në kuadër të “Flakës së Janarit” në Gostivar, ishin disa nga aktivitetet që shënuam 43 vjetorin rënies heroike të Jusuf e Bardhosh Gërvallës dhe Kadri Zekës, informon Klan Macedonia.
Në këto përkujtime ka marrë pjesë edhe lideri I BDI-së, Ali Ahmeti, i cili në profilin e tij në Facebook, shkruan se fatkeqësisht, rreziqet ende ekzistojnë; armiqtë e shqiptarëve vazhdojnë të hartojnë plane të ndryshme kundër shqiptarëve.
Sipas Ahmetit, në këtë janar, kujtohen të gjithë ata të cilët luftuan e punuan për liri të shqiptarëve, kurse tani duhet punuar me mençuri.
“Lirinë e fituam me gjak, tani duhet të punojmë me shumë mençuri, ashtu sic kanë qenë të mençur shokët tanë, bashkëluftëtarët tanë, të rënët, që vendet tona t`i prosperojmë, vendet tona t`i shpiejmë aty ku e kanë vendin – tek vendet e përparuara, të jetojmë si shqiptarë ashtu sic e kanë dashur heronjtë tanë, shqiptarët pa kufij, të bashkuar, të shkolluar e të përparuar. Të integruar në të gjitha strukturat euroatlantike”, tha Ahmeti.
Jusuf e Bardhosh Gërvalla dhe Kadri Zeka janë shembull i veprimtarisë kombëtare të shqiptarëve, që kulmoi me themelimin e Ushtrisë Çlirimtare të Kosovës – u tha në Akademinë Solemne në Gostivar.
Ata luajtën një rol kyç në unifikimin e grupeve të ndryshme ilegale të kohës, duke krijuar një front të rezistencës dhe një lëvizje mbarëkombëtare të shqiptarëve në ish-Jugosllavi, që përfundimisht i solli lirinë dhe pavarësinë Republikës së Kosovës. /tvklan.mk
