Fetai: Viti i punësimeve për shqiptarët – Shëndetësia me Azir Aliun kryeson me rekord

Zëvendëskryeministri Arben Fetai, në intervistë për Kanal10, ka deklaruar se në Maqedoninë e Veriut, shqiptarët qëndrojnë shumë mirë.
“Ne së shpejti do të dalim me rezultatet e punësimeve, ne kemi premtuar 2.500 punësime brenda vitit. Ne jemi shumë afër këtij numri, edhe pse viti ende nuk është përmbyllur. Si VLEN kemi bërë shumë punësime dhe avancime brenda administratës. Duhet të theksohet se avancimet janë të rëndësishme në vendin tonë, pasi kemi pasur persona që janë punësuar nga viti 2002 dhe kanë qëndruar në nivelin më të ulët të administratës si bashkëpunëtor të rinj për 20 vjet”, tha Fetai.
Fetai shtoi se gjatë vitit të kaluar nuk ka pasur aspak punësime për shkak revizionit fiskal, por nga ky vit, ne kemi filluar me punësime dhe shqiptarët po marrin hisen që u takon.
“Shëndetësia është një sektor ku ka pasur një “boom” të punësimeve. Ministri Azir Aliu për 45 këto ditë sa është ministër ka realizuar 1250 punësime, që është rekord vjetor i jashtëzakonshëm sa i përket punësimeve në sektorin shëndetësor”, nënvizoi Fetai.