Qeveria ka arritur një marrëveshje për dërgimin e disa ambasadorëve të rinj në përfaqësitë diplomatike të vendit, dhe koalicioni VLEN ka siguruar që shqiptarët të kenë përfaqësim të denjë në këtë proces.
Zëvendëskryeministri Arben Fetai, në një intervistë për emisionin “Dialog” në Lajm TV, konfirmoi se si pjesë e marrëveshjes, 1/4 e ambasadorëve të rinj do të jenë shqiptarë. Ai theksoi se përzgjedhja do të bazohet në profesionalizëm dhe meritokraci, duke lënë pas praktikat e mëparshme të emërimeve politike.
“Ne si koalicion VLEN, si shqiptarë në pushtet, e kemi 1/4 e hises dhe do të shihni që ambasadorët që do të dërgohen në misionet tona dhe ambasadat tona nëpër botë, 1/4 prej tyre do jenë shqiptarë, të përzgjedhur më të mirët, profesionistët më të mirë që të kemi një përfaqësim dinjitoz, i cili na ka munguar”, u shpreh Fetai.
Ai kritikoi qasjen e mëparshme të Ministrisë së Punëve të Jashtme, duke theksuar se diplomacia e vendit ishte shndërruar në një mjet për të rehatuar militantë partiakë. Fetai solli në vëmendje rastin e Vesel Memedit, duke thënë se nuk do të ketë më emërime të tilla.
“Nuk do të ketë më Vesel Memeda. Nuk do të ketë më shpërblim të militantëve partiakë në pozita ambasadorësh”, tha ai me vendosmëri.
Kjo qasje e re e Qeverisë dhe e koalicionit VLEN pritet të sjellë një ndryshim të madh në përfaqësimin diplomatik të shqiptarëve, duke garantuar emërime bazuar në profesionalizëm dhe aftësi në vend të lidhjeve politike.
