Fetai: BDI voton ligjin vetë, pastaj shpif kundër qeverisë

Zëvendëskryeministri i Qeverisë së Maqedonisë së Veriut i ngarkuar për politika të qeverisjes së mirë, Arben Fetai, ka reaguar sot lidhur me distancimin e Bashkimit Demokratik për Integrim (BDI) nga ndryshimet në Ligjin për organizimin e organeve të administratës shtetërore, ndryshime që vetë deputetët e kësaj partie i votuan më 10 qershor 2024.
Fetai thekson se BDI, për 22 vite me radhë në pushtet, ka mashtruar qytetarët duke bërë qindra kompromise të dëmshme në kurriz të shqiptarëve, ka heshtur përballë rasteve të montuara politike dhe nuk ka kërkuar drejtësi për vrasjet e paqarta të ish-ushtarëve të UÇK-së.
“Edhe sot, si opozitë, sillen njësoj: fillimisht votojnë me dorën e tyre për ndryshimet në rregullimin e administratës shtetërore, e më pas sulmojnë qeverinë për gjoja ‘çbërjen’ e Inspektoratit për Përdorimin e Gjuhëve,”, shkruan Fetai në profilin e tij në Facebook.
Ai i kujton opinionit publik se Ligji për ndryshimin dhe plotësimin e Ligjit për organizimin dhe punën e organeve të administratës shtetërore është miratuar nga Kuvendi me 88 vota për, 22 kundër dhe asnjë abstenim, para se të zgjidhej qeveria e re. Sipas tij, ndryshimet nuk e prekin vetëm Inspektoratin për Përdorimin e Gjuhëve, por vlejnë për të gjitha inspektoratet, duke i hequr statusin e personit juridik dhe duke i sistemuar nën ministritë përkatëse, sipas një modeli më të qartë e më efikas të llogaridhënies dhe koordinimit institucional.
“Sot, kur zhurmuesit e BDI-së derdhin lot krokodili, u bëjmë thirrje të kërkojnë llogari nga deputetët e tyre – duke filluar nga kryetari e tutje,” përfundon Fetai, duke shtuar se rrena i ka këmbët e shkurta.