Fatmir Limani
NUK BËHET KËRÇOVA… !
Është e kotë ta mohoj që lidhja me rrënjët, me vendin e babës e nanës, të zemrës dhe të mendjes, të ëndrrës, e të zhgjëndrrës, më bën të mbetem gjithë kohën brenda projektit tim të Bërjes së Kërçovës. Edhe pas 19 tetorit.
Mirëpo kur reflekton rreth bërjes, pra reales, projektit të zemrës e mendjes sime, nuk mund të mos reflektosh rreth asaj sesi nuk bëhet Kërçova !!!
Jam i detyruar të reflektoj sepse sapuni nuk është djathë, e nuk mund të hahet dhe oferta që qarkullon në politikën aktuale është shitja e sapunit për djathë.
E pra, Kërçova nuk bëhet duke e kërkuar që nën hijen apo flamurin e shqiptarizmës të degjenerohet në nivele të paimagjinueshme, të kemi bjerrje të vlerave morale që shitet pastaj si vlerë kombëtare.
● Nuk bëhet Kërçova edhe duke harruar që mbrënda territorit të saj, jetojnë njerëz të etniteteve të ndryshme, të cilët vuajnë për bukën e gojës.
● Nuk bëhet Kërçova me kandidatë që vriten e priten në emër të gjuhës, flamurit, historisë, heronjëve, me të cilët s’kanë as lidhje gjenetike, por edhe nuk karakterizohen me trimëritë e tyre.
● Nuk bëhet Kërçova me parollat të mbetet e jona ose sërish do të jetë e jona, kjo nga fakti që e jona (fëmijët dhe nipa-mbesat) largohen çdo ditë në shtetet e huaja.
● Kërçova nuk bëhet pa implementim dhe respektim të ligjeve, pa krijuar kushte të mirëfillta nëpër çerdhe, shkolla, spitale, lagje, vendbanime.., s’bëhet pa zhvillim dhe aq më pak pa njerëz !!!
● Kërçova nuk do të bëhet kurrë, duke u mbuluar nën hijen e flamujve të etniteteve të ndryshme dhe duke pretenduar që është e njërit ose etnitetit tjetër. Nuk do të bëhet sepse popullata është përcaktuese e tapive dhe çdo pëllëmbë toke.
● Kërçova nuk bëhet, pra nuk ruhen simbolet shqiptare a të tjera, me përdorim gjuhe të shumicës kur kemi ikje nga ky realitet i trishtë i të rinjve dhe të rejave, i familjeve të tëra dhe kur flamuri kombëtar përdhoset me bjerrje vlerash njerëzore.
Bazuar në ligjet vendore gjuha mund të flitet vetëm nëse përmbush kushtin e 21 përqindshit dhe flamuri mund të valëvitet nëse përfaqësimi është 51 përqind. Por të gjithë harrojmë që me fluksin e largimit të të rinjëve, pas dhjetë viteve asnjë etnitet nuk do të plotësojë këto kushte.
Kërçova bëhet me alternativë përmbajtësore të gjithë këtij degjenerimi vlerash kombëtare, shoqërore e individuale.
E kam një projekt për Kërçovën që do bëhet, e për të cilin do luftoj nga çdo pozitë që të jem.
Kërçovën e pretendoj që njëherë të ndërtohet dhe zhvillohet përmes investimeve dhe realizimit të projekteve kapitale, duke e shndërruar në qendër rajonale dhe atraktive.
Bashkërisht do të sjellim dritën e përparimit, do të mundësojmë riatdhesimin e të rinjve e të rejave, do të sjellim emancipimin shoqëror, do të afirmojmë vlera të reja, e do riafirmojmë ato vlera që na bëjnë të quhemi shqiptarë, kërçovarë, e me të cilat kemi mbijetuar 2000 vjet !
Kërçova bëhet duke u karakterizuar nga vyrtytet e durimit të thellë, maturia e papeshuar, urtësia e pakrahasuar.., përkushtimi, transpareca, bujaria dhe besnikëria e palëkundur.
Kërçova do të bëhet vetëm duke përzgjedhur më të mirët në krye të udhëheqjes, për të sjellur zhvillimin e shpejtë në vendin tonë.
F. B. L.
