Sekretari i Komunës së Çairit, Faruk Nevzati, ka ndarë një deklaratë publike ku ka vlerësuar kandidaturën e Izet Mexhitit për zgjedhjet e ardhshme komunale. Ai thekson se, ndryshe nga kandidatët e tjerë me të cilët nuk ka pasur bashkëpunim të afërt, për Izet Mexhitin mund të flasë me kredibilitet të plot, duke qenë se ka qenë nëpunës dhe bashkëpunëtor i tij për plot 12 vite (2005-2017), gjatë tre mandateve kur Mexhiti ka drejtuar Komunën e Çairit.
Sipas Nevzatit, përvoja e gjatë ka bërë që ta njohë mirë qasjen, ndjeshmërinë dhe mënyrën e funksionimit të Mexhitit, të cilat e lidhin fort me qytetarin e zakonshëm dhe e bëjnë atë të pranueshëm për shumicën absolute të banorëve të Çairit.
“Edhe në demokracitë më të avansuara botërore është vërtetuar se ky koncept dhe kjo qasje janë ato që qytetarët i admirojnë dhe i votojnë gjatë dhënies së besimit për t’i udhëhequr, qoftë në nivel lokal apo shtetëror,” u shpreh Nevzati.
Ai më tej ka listuar tetë karakteristika dalluese që, sipas tij, e bëjnë Mexhitin favorit absolut për të fituar zgjedhjet:
Aftësia për të kuptuar nevojat reale të qytetarëve.
Të folurit e gjuhës së popullit, pa komplikime apo fraza boshe politike.
Përulësia dhe modestia në komunikim me qytetarët.
Besueshmëria dhe afërsia me njerëzit.
Përfaqësimi i dinjitetshëm i shtresave të ulëta.
Puna e palodhur dhe këmbëngulja.
Lidhja e fortë me komunitetin dhe njohja e realiteteve të përditshme.
Pavarësia nga interesat elitare dhe rezistenca ndaj aleancave të fshehta politike.
Në vijim, Nevzati ka bërë edhe një krahasim mes Mexhitit dhe kandidatëve që burojnë nga shtresa të privilegjuara, të cilët, sipas tij, shpesh kanë lidhje të dobëta me realitetin e qytetarëve, komunikim burokratik, varësi nga elitat politike, imazh të ndërtuar mbi marketing dhe prirje për arrogancë.
“Një kandidat që nuk buron nga populli rrezikon të jetë një udhëheqës pa rrënjë, pa bazë dhe pa mbështetje, që gjithmonë flet mbi njerëzit, por jo për njerëzit,” ka përfunduar Nevzati.
