Ka ndërruar jetë edhe një pacient tjetër që po trajtohej në Lituani, duke e çuar në 61 numrin e viktimave nga zjarri tragjik në diskotekën “Puls” në Koçan, më 16 mars.
Pacienti nuk arriti t’i mbijetojë plagëve të rënda të shkaktuara nga zjarri. Më shumë detaje pritet të bëhen publike së shpejti nga ministri i Shëndetësisë, Arben Taravari.
Të premten, Aleksandar Karadakoski – një tjetër i lënduar që po trajtohej në Lituani – po ashtu ndërroi jetë nga plagët e marra. Trupi i tij është kthyer dje në Maqedoni dhe do të varroset nesër në Koçan.
Nga zjarri në diskotekën “Puls” mbetën të lënduar 196 persona, të cilët po trajtohen si brenda vendit, ashtu edhe jashtë tij.
